Bastian Nevacho a Bobbio Pellice

La tragedia en lenga occitana Bastian Nevacho de Diego Anghilante, aprés aver virat en las valadas aquest’istaa, arriba a Buebi en Val Pelis sande 16 de novembre del 2019 a 21 oras ental Salon Polivalent. L’òbra, presentaa al concors “Premi per un texte teatral en las lengas del Piemont” e premiaa da la Region Piemont ental 2011, es estaa premiat ental mesme an decò en la seccion teatre del Gran Jo Flourau del Felibrige francés. Publiaa ental 2012 dal Centro Studi Piemontesi de Turin es jamai estaa rapresentaa fins que, ental 2018, l’autor abo quarque actor amator e mairelenga des valadas Estura e Grana a decidut de presentar-la al public.  

Gracias a Espaci Occitan, e abo l’important sostenh de la Region Piemont, es naissut lo Teatre de la fiour per l’adaptament de Bastian Nevacho. S’es cernut de presentar una seleccion de passatges, liats da la votz de l’autor que, en italian, es lo narrator que companha entre las diferentas scenas. 

Bastian (Sebastiano Degiovanni, dich Nevacho per sobriquet d’familha) es un “marrit” que ista ent’un paìs des autas Valadas Occitanas al principi de lhi ans ‘70, quora l’emigracion e lo parelh dich progrés esbrison per sempre la societat d’la civiltat alpina. Bastian, lingièra de mesa etat que viu entre rebellions chumias, chocas e prepotenças sensa capir aquò que se passa dedins e dentorn a nele, es un perdent, e sa vita es dominaa, coma ent’una tragedia antica, da la mòrt, dal torment e da un destin sensa sens. Lo drama trucha un argoment delicat ent’una lenga occitana que mescla paraulas fòravia e rafinaas a autras grossièras e popolaras, ente s’entreçon lhi registres dramatic e realistic. Da part d’Espaci Occitan, un novèl empenh en la valorizacion de lenga e cultura occitana a travèrs lo teatre, forma d’art pas tròp presentaa en las valadas.

L’intrada es gratis. L’òbra teatrala es pensaa per un public adult e preparat a una istòria dramatica.

Regia e votz narranta Diego Anghilante; actors Claudio Franco, Manuela Damiano, Marco Parola, Guido Garnero, Luciana Ortu.  

L’iniciativa es realizaa abo la collaboracion de la Comuna de Buebi, de l’Associacion Pro Bobbio Pellice e de l’Union Montana del Pinerolés. Autres apontaments, lo 23 de novembre a Sant Dumian e lo 6 de decembre a Criçòl. Per informacions sus l’espectacle Espaci Occitan: www.espaci-occitan.org, segreteria@espaci-occitan.org, Fb @museooccitano, Tw @espacioccitan, tel 0171904075.